Alle skulle bli dronning

Gabriela Mistral var mestis, og ikkje berre medviten om det, ho gjorde det til eit adelsmerke. Ho var sterkt sosialt engasjert, ikkje minst kjempa ho for barns rettar. Eit anna gjennomgripande trekk er at ho viser kvinnas mange fasettar. I mangt var Gabriela Mistral kompromisslaust og brutalt nyskrivande. Ho stakk pennen sin i verkebyllar i eit samfunn som ikkje alltid var modent nok til å ta imot. Ein stor del av verket hennar går ut på å krinse inn, kartleggje og vise den latinamerikanske identiteten. Diktsamlinga Tala (1938), som mange av dikta i denne samlinga er henta frå, kalla ho også "rota til det indiansk-amerikanske".